ماسكات طبيعية للعناية بالشعر الجاف والتالف

ماسكات طبيعية للعناية بالشعر الجاف والتالف

ماسك الجرجير للشعر

المقادير:

• 2 حزمة جرجير
• ملعقة متوسطة كحول (سبرتو أبيض)

الطريقة:

قطّعي الجرجير واضربيه في الخلاط كويس جدا وصفّيه، وناخد العصير ده ونخلطه مع السبرتو الأبيض، ونحتفظ بالخليط ده في زجاجة في الثلاجة، وممكن نستخدم الخليط ده مرتين أسبوعيا، ونسيبه لمدة ساعة على فروة الشعر، وتقدري كمان تسيبيه على شعرك طول الليل وتشطفيه تاني يوم.

بلسم بالجرجير للشعر الجاف

المقادير:

• ½ كوب عصير جرجير
• بلسم

الطريقة:

اخلطي الجرجير مع البلسم، وحطّي الخليط على شعرك وهو مبلول وسيبيه لمدة نصف ساعة، وبعد كده اشطفيه.

ماسك الخوخ لنعومة الشعر والقضاء على القشرة

المقادير:

• 2 ثمرة خوخ مسلوقين
• 1 ½ ملعقة عسل نحل
• ملعقة صغيرة خل التفاح

الطريقة:

اضربي الخوخ في الخلاط كويس، وقسّمي كمية الخوخ لنصفين، وبعد كده ضيفي العسل على نصف الكمية وقلّبيهم مع بعض، وضيفي عليهم ملعقة خل التفاح، وبعد كده وزّعي الخيط ده بفرشة الصبغة على جذور الشعر، وسيبيه لمدة 30 : 45 دقيقة، وبعد كده اشطفي شعرك.

حمام كريم بالخوخ

نجيب الجزء الباقي من الخوخ المسلوق المضروب ونصيف عليه حمام كريم ونضيفه على الشعر لمدة من 30 :45 دقيقة.

لوسيون السمسم للشعر شديد الجفاف

المقادير:

• 3 ملعقة كبيرة سمسم
• ½ كوب ميه سخنة

الطريقة:

اخلطي المقادير دي مع بعض، وسيبي السمسم منقوع في الميه لمدة ساعتين أو ثلاثة، أو من بالليل للصبح، وبعد كده صفّي الميه، وخدي اللوسيون ده واستخدميه على فروة شعرك.

لوسيون القهوة لتساقط الشعر

المقادير:

• 4 ملعقة بن فاتح
• 2 ملعقة عسل نحل
• كوب كبير ميه مغلية

الطريقة:

ضيفي البن على الميه المغلية، وسيبيهم يغلوا مع بعض على النار لغاية ما كمية الميه تقل للنصف، وبعد كده صفيّهم كويس، وخدي تنوة القهوة وضيفي عليها ملعقة من زيت جوز الهند، واستخدمي الخليط ده على شعرك زي الحنة.

أما مصفّى القهوة فدي بتاخديها وبتضيفي عليها ملعقة تانية من العسل، وتقلّبيهم مع بعض كويس أوي، واستخدمي اللوسيون ده على فروة شعرك.

حمام كريم بالمايونيز لشعر حرير

المقادير:

• 3 ملعقة كبيرة مايونيز سادة
• 3 ملعقة حمام كريم سادة

الطريقة:

قلّبي المكونات دي مع بعض كويس أوي، وحطّيهم على شعر نظيف لمدة ساعة كاملة، وبعد كده اغسلي شعرك بالشامبو، ومع استخدام الخليط ده هتحسي إن شعرك مفرود وناعم ومش هايش، وممكن تستخدميه من مرتين إلى ثلاثة كل أسبوع.